ZIT FÜR E IDEE
Heit dir mängisch o ds gfüuh dases mit üsere wäut zimli de bach abgeit? Es gäbt so viu sache wome angers oder eifach besser chönnt mache, aber es machts irgendwie niemer. Schiterets a de politik, a de wirtschaft, de gseuschaft oder eifach jedem einzelne mönsch? Was spile mir i däm ganze theater fürne roue? Irgendwie gseehts derna us, das üsi generation uf ganz viu abhängigkeite zuestüret. Hallo Handy-Zombies. Hallo Generation Z. Viu Lüt si unglücklech, unzfride, mit angerne, mit auem hie oder eifach mit sich säuber. Wieso si si das und was löst di ganze struggles eigentlech us? Mir si jung und üüs ghört ds aues hie irgendeinisch, mache düemer aber nid gross öppis und sowieso wird üses läbe immer no vo „fasch-rentner“ regiert. Mir si zu hert druf fokussiert, was i üsne kreise aus cool agluegt wird, sueche nach anerkennig in form vo likes, fame oder schüsch öppisem und rede schlächt über angeri lüt wo genau ds gliiche mache. Inere wäut wo aui wei angers si, isch schlussändlech jede glich. Eis steit fest: Ds läbe isch säute fair. So trifft es problem wo einzelni oder mir aui verursacht hei i viune fäu di schwache, di mittulose. Es isch a üs. Poetischi grächtigkeit oder? Das wär cool. Wo d politik und aui mönsche drumum versäge, gits no öppis wo macht het. Kunst, üsi kunst, egau was. Ds hie söu e site wärde für üsi generation, vouer lyrik, gseuschaftskritik und kunst, vouer stimme, egau was. Jede cha irgendwie mitmache, auso dänk nache, jede chas verbreite, auso verbreits, jede cha öpis bewege, auso mach. Mach eifach. Wüu wörter chöi mächtiger si aus aues angere. Poetischi grächtigkeit äbe.
BY FITCH